लेखक, कवि, गीतकार एवम् सामाजिक अभियन्ता शेखर ढुङ्गेललाई सम्मान गरिएको छ । यही फागुन ५ गते शनिबार ऐतिहासिक शहर भक्तपुरमा आयोजित एक कार्यक्रमबीच ढुङ्गेललाई सम्मानित तुल्याइएको हो ।
अभियन्ता ढुङ्गेल जन्मे/हुर्केको तथा पढे/बढेको जिल्ला भक्तपुरमा स्थापित सृजना अभियान समाज भक्तपुरले विदेशमा रहेर पनि साहित्यका विविध विधा एवम् सामाजिक सेवामा पुऱ्याएको योगदानबापत उनलाई सम्मान गरेको हो ।
संस्थाका सचिव एवम् प्राज्ञ ध्रुव मधिकर्मीले उक्त विशेष कार्यक्रममा स्वागत मन्तब्य राख्दै शेखर ढुङ्गेलले लेख, कविता, कथामार्फत समाज परिवर्तनको लागि देशलाई पुऱ्याउनुभएको योगदानको लागि सम्मान गर्न पाउँदा खुशी लागेको बताउनुभयो । यस्तै, चर्चित गीतकार सुवासचन्द्र ढुङ्गेलले आफ्नो शुभ कामना मन्तब्यमा शेखर स्कुल/कलेजदेखि नै सामाजिक विकृति-विसंगति र भ्रष्टाचारविरुद्ध विद्रोहीरूपमा रहेको भन्दै शेखरका बाल्यकालदेखिको स्वभावबारे प्रकाश पार्नुभयो ।
