October 5, 2009

खेर गएका नमस्कार

- जोतारे धाइबा

छिमेकी मुलुकसँग देशको व्यापार घाटा चुलिएर अरबौंको नोक्सानले राष्ट्रिय अर्थतन्त्र भ्वाङ पर्दै गएको सुनिन्छ बेलाबेला । व्यापारमा घाटाको कुरा उसो त नौलो होइन । नाफादायक चोक्टा खान हिँडेकी बूढी घाटाको झोलमा डुबेर मर्नु सामान्य कुरा हो । यसरी घाटा हुनु व्यापार खेर जानुबराबर हो । खेर गएका धेरैधेरै व्यापार जस्तै अचेल नमस्कार पनि खेर जान थालेको छ । हेर्ने हो भने यही नमस्कार मानव समाजको लागि ठूलो उपहार हो । शिष्टाचार र आदरभाव प्रकट गर्ने माध्यम नमस्कार खेर गएपछि नमस्कारकर्तालाई घाटा लाग्नु स्वाभाविक हो । यस्तै घाटाको कारोबार गर्ने नमस्कार ठाउँ न ठहर त्यसै खेर गएर जिन्दगीमा बेलाबेला ठगिनुपर्छ ।

नमस्कारको नशा लागेपछि नमस्कार नै गरुँगरुँ हुन्छ जहाँ पनि जसलाई पनि । यसैले मानवसमाजमा हार्दिकता र आदरभाव प्रकट गर्ने सरल माध्यम भए पनि नमस्कारको खेल जूवाभन्दा कम नशालु छैन ।
अड्डा अदालत कारखानादेखि नातागोताका दसगरी जालोमा नमस्कार गरीगरी नाफा निकाल्ने सुर हुन्छ । तर गर्ने के गरेका ती तमाम नमस्कार खेर गएर वित्यास पर्छ । नमस्कारको निशानाले सधैँसधैँ चरा मार्दैन । कहिले त करोड लुट्न सक्ने यो नमस्कारको तीरले माखो नमारेर लाजमर्दो हुन्छ ।

व्यापारमा घाटा व्यापार गरेपछि भए जस्तै नमस्कार खेर गएको पनि नमस्कार गरिसकेपछि पत्तो लाग्छ । त्यसैले कसलाई कसरी कुन स्तर र भावभंगीमा नमस्कार गरियो भन्ने कुराले निकै अर्थ राख्छ । नमस्कार गनुपूर्व सावधानी र समझ अपनाउनु नमस्कार-कारोबारको न्यूनतम एजेन्डा हो । यो जानिएन भने रोएबराबरको दुःख पाइन्छ । यसैले नरुनलाई भए पनि नमस्कार बजाउनु आजको युगको माग हो । गाउँले जनजीवनको साधारण जदौदेखि राष्ट्रिय र अन्तर्राष्ट्रिय स्तरको ठुलठूला सलाम र नमस्तेमा निहुरमुन्टी बन्न जो कोहीको कलाकारी खुबीले भ्याउँदैन । यो कला चानचुने नभई सर्कसखेलमा झिनो डोरीमा ठमठम हिँड्नुपर्ने जस्तो जोखिम हो ।

नमस्कारको हाम्रो आधारभूत प्रशिक्षण स्कुले जीवनदेखि नै सुरु हुन्छ । कक्षामा आफू कहिल्यै नझुल्किए पनि पढाउने गुरुबा-आमालाई थपक्क जुम्लाहात टक्र्याएर परीक्षामा दह्रो परिणाम हात पार्न हाम्रो नमस्कार-यात्रा लागूऔषध जस्तै निरन्तर चल्छ । धर्मकर्ममा गुरु-बाबाजीसँगको सत्संगमा होस् या जागिरे सेवाको उच्च अंगमा होस् टक्र्याइसकेको नमस्कारको सौगात घरिघरि बेकार बन्छ । यस्तो जोखिमको खेल भए पनि नमस्कारको तीर हान्न नछोडिनु मानवीय शिष्टाचारको अपूर्व संस्कार हो ।

आफू ज्वाइँ भएपछि सासूलाई रीत पुर् याएर नमस्कार गरिएन भने भान्सा छिर्दा पनि घिच्चासेको आरोप लाग्ला भन्ने डर हुन्छ । अन्यथा सही रीत पुर् याएर गरिएको नमस्कारले तपाईँलाई घ्यू चाहिएको छ कि मासुको लेदैलेदो मुछेर भूजा ज्यूनार गर्न मन छ कि, सासूज्यूबाट तुरुन्तै त्यसको बन्दोबस्त गराउँछ । सबै आतिथ्य नमस्कारको बुइ चढेर सरक्क सामुन्नेमा टुप्लुकिन्छन् । माइतमा छोरी वा दिदी-बहिनीको रुपमा आफू गइएको छ भने पनि नमस्कारको भूमिका धेरै हुन्छ इज्जतको गाँठो कस्नमा । नत्र त बिहे गरेर गएपछि कस्ती टिमुर्किएकी भइछ भनेर सोच्लान् भन्ने पीर ! यस्तो पारिवारिक लहरादेखि सांसारिक पहरा बेर्ने नमस्कारलाई खेर जान नदिई असुलउपर गराउने रुपमा सदुपयोग गर्न सकौँ, नमस्कार विद्याले यही जुक्ति देओस् ।

6 Comments:

लेकाली said...

बिछट्टै हाँसो लाग्ने ब्यङ्ग्य पस्किनु भयो हो धाइबाले। एक्लै कोठामा जोड सँग हासेको कुन्नी छिमेकी कोठातिरकाले लौ यो त बौलाएछ भन्यो क्यारे!लौ मलाई त नमस्ते टक्राउन पनि डर पो लाग्न थाल्यो।

Kedar Shrestha'Gagan' said...

Byabaharika byanga. Utkrista Lagyo Dhaiwajee.

पुष्प said...

आफ्नो ससुरालीमा त नमस्कार चल्दैन ।

Zero Hour (शुन्य समय) said...

यो कलामा आंफु पारंगत नभएर आफुले पनि बेला बेलामा दुख पाइएको छ ।

नेपालियन said...

धाइबा जी को राजनैतीक पेच आउने म त कुन नेताले कुन बिदेशिलाइ नमस्कार गरेर खेरा गएछ भनेको त हामी सबैको खेरा जाने नमस्कार रहेछ।

नमस्कार भनेको एक प्रकारको सम्मान हो। सम्मान पाए पछि मान्छे मात्रै होइन कुकुर पनि लुरुक्क भनेको मान्छे। कुकुरलाइ ढुंगाले हिर्काउनुहोस त , भोली देखी यता आइजा भने उता जान्छ। भने पछी मान्छै ले त मान पक्कै खोज्ने नै भए। खेरा जाओस नजाओस नमस्कार चै काम पट्टाउन सबैले टक्राइहाल्औं है?

dong dong23 said...

christian louboutin shoes
polo shirts
the north face sale
true religion outlet
ray ban glasses
coach bags
nike mercurial vapor
nike air max 90
louboutin outlet
michael jordan shoes
2017.5.18chenlixiang

Post a Comment

>>> कमेन्टको लागि धन्यवाद !